Трговијата и трговските врски во Скопје меѓу двете светски војни
	Скопје како трговски центар
	Скопските трговци
	- Внатрешна трговија
	- Надворешна трговија
	Трговските врски како културна еволуција во начинот на живеење и материјалните промени
	Скопската трговска младина
	Скопските пазари
	- Асортиман и цени на скопските пазари
	- Улични трговци

Во периодот 1918 - 1941 година скопската трговска младина претставувала сосема нова појава, бидејќи нивните претходници биле самоуки и самоникливи трговци или пак обучени надвор од Скопје и Македонија.

Во наведениот период скопската младина можела да го креира своето образование и да го насочи во определен правец. Така, во Скопје,  веќе биле создадени услови за формирање на трговски стручни кадри. Во 1920 година во Скопје била формирана Трговската школа на скопската младина. [1]

15.5. Ученици во Трговското училиште на Скопската трговска младина, 1923 год., од фототеката  на МГС

Со унапредувањето на одделни стопански гранки, се појавила и потреба од стопански институции кои придонеле за развој на стопанството, водење на евиденција и статистика на нивниот пораст и слично. Ваквите институции биле распределени во две групи и тоа: стопански и културно - стопански. Во првата група спаѓала Трговско-индустриската комора во Скопје којашто била основана уште во 1913 година како Одделение на Трговската комора од Белград. Со брзото унапредување на трговијата се појавила потреба за основање на самостојната Комора во Скопје. Така, во 1921 година била донесена Уредба за оваа институција, според која нејзините членови се избирале на две години и тоа само од скопските трговци. [2]

Трговско-индустриската комора со седиште во Скопје опфаќала голема територија [3] , управувана од 44 члена од кои  12  биле од Скопје, шест трговци [4]   и шест индустријалци кои го сочинувале Советот.

Во 1925 година бил донесен Статут на Трговско - индустриската комора, потпишан и одобрен од Белград (бр. 1 310).

Овој Статут стапил во сила веднаш по неговото одобрување од Министерството за трговија и индустрија во Скопје. Во почетокот на 20-тите години на 20 век, Комората ја сочинувале: Т. М. Поповиќ-претседател, Драг. Милиќевиќ-секретар, Тодор Родаковиќ-потпретседател и осум членови: Спира Милошевиќ, Беќир Емин, К. Ризовиќ, Моис Асео, Паја Манојловиќ, Властимир  В. Милкиќ, Зејнел Јусуф Мурина, Д. Вучедолец. [5]

Освен во наведените институции за водење на сметководство, книговодство и законодавство, скопската младина се образувала и во други училишни центри и школи. Една од нив била Државната мајсторско-сметководна вечерна школа во Скопје каде што учел братот на спомнатиот Теофан Вулгаракис - Захарија, леар од воената артилериска работилница во околината на Скопје, во Ханриево. Во тоа време, овој воен објект бил познат како Пиротехнички завод.  Во 1937/38 учебна година директор на школата бил Душан Андрејевиќ, а професори: Јован Поповиќ, Јован Весели (стручен наставник), Александар Кирковиќ (инспектор од Министерството за трговија и индустрија) и др. Меѓу предметите од наставниот план биле и книговодство и законодавство. По завршувањето на оваа вечерна школа, на пример, Захарија Вулгаракис, познавајќи го одлично книговодството, положил завршен испит на машинското одделение пред Одборот за испити со многу добар успех и добил звање мајстор на леарскиот занает. [6]

Голем придонес во стручното оспособување на скопската трговска младина одиграла и Библиотеката на Трговската скопска школа. Библиотеката на скопската трговска младина, со полн фонд на книги од домашни и странски автори, била отворена за читателите секој понеделник и петок од 7, 30 до 21,00 часот. Младинскиот отсек бил организатор на низа популарни предавања од областа на науката, а со цел унапредување на стручното  и општото образование на своите членови. [7]

Од овие податоци станува јасно дека во Скопје се раѓала, растеле и јакнела една нова генерација, како дел од скопската граѓанска класа, која своето стручно образование можела да го стекне во својот роден град.