Во периодот пред Првата светска војна кога градот бил распространет на левата страна на реката Вардар, постоела разгранета мрежа на примитивно соѕидани канали за одвод на нечистотија. Коритото на реката Серава кое било засводено со насип долг 2 км и по 1918 год. било искористено како главен колектор во кој се влевале каналите од стариот дел на градот. Во тесните населени појаси распоредени на левата и десната страна на реката, постоеле попречни канали за излевање на нечистотијата директно во јазовите, покрај кејот на реката. [1]

10.1. Јаз на реката Вардар, МГС инв. бр. 1801

 Покрај примитивноста на каналите, како и хигиенската опасност, во 1926  год. се јавила идеја за изградба на модерна канализациона мрежа.

Нечистотијата од куќите, зградите, амамите и индустриските претпријатија се спроведувала низ посебна мрежа на канали на реката, низводно од градот. Дождовната вода се одливала од уличните олуци во постоечки канали и јазови.

Најголем број од куќите имале дупки со биолошко прочистување. Јавни клозети во градот имало осум и сите биле примитивни. [2] Нужниците биле непрописно градени во близина на бунари и често се случувало куќите да бидат поплавувани.

Голем број дуќани и угостителски објекти немале свои клозети и мијалници.
Во 1932 год. Општинскиот суд во Скопје донел правилник за работа, за чистење и изнесување на нечиста течност, а оваа работа била во надлежност на Општината преку свои служби.

Освен оваа служба, чистењето го вршеле и Цигани-приватни чистачи кои оделе по улиците и се нуделе за чистење на нужниците, со коњски коли, метални цистерни или дрвени буриња.

Одделот за нужници располагал со три коњски коли и железни буриња со запремнина од 3500 л³. Општината требала да набави и моторна кола со автоматско полнење и празнење. Нечистотијата и помијата се исфрлала низводно во реката Вардар. [3] Градот Скопје постепено ги прифаќал културните норми на живот, но поради слабата материјална моќ, тоа во целост не можело да биде остварено. Во периодот помеѓу двете светски војни делумно биле регулирани коритата на  реката Вардар и Серава.